النشور والكذب

النشور والكذب

السلام عليكم ورحمة الله وبركاته....

كل مشكله ولها حل بإذن الله واتمنى مساعدتكم...

شاب 24 سنه ومتزوج من سنتين تقريبا وزوجتي 20 سنه.

في فترة الملكه اتفقنا على كل شي وصار الزواج ورحنا اسبوع لتركيا ومن هناك سافرت لمقر بعثتي كندا. اول 3 شهور مشاكل غيره لا اكثر. تزوجت وانا في 22 وزوجتي 18 ووقتها كنت عايش بكندا لأكثر من 4 سنوات وكنت واثق بأني على قدر المسؤوليه ودخلت المادي ممتاز للزوجين في بداية حياتهم...أثرت المشاكل علي وعلى دراستي خصوصا أن المشاكل كانت بالساعات والايام...بعد فترة طلبت منها تلغي دراستها وتتفرغ للبيت لمشاكل لها علاقه ب العبايه والحجاب...جلست في البيت بس نوم وتلفزيون وطلبات وبس...ويشهد الله بأني كنت اخرجها يوميا خصوصا في الغربه مافي احد عربي قريب مننا فكنا نخرج بشكل شبه يومي نغير جو لكن مشاكلنا كانت عن الغيرة لا أكثر وفي يوم من الأيام لاحظت البنت بدات تقعد ع الجوال حتى وانا بالبيت وهيا جنبي طاحت عيني على رساله من امها تحرضها علي وتطلب منها شغلات بس عشان تخلي زوجتي تسيطر علي ومن ضمن الكلاب لاتسويله شي الا بمقابل حتى الغداء إذا سويتي اطلبي منه هديه مقابل تعبك واطلبي منه كل كم يوم فلوس ووووو حتى الأمور الزوجيه اللي ما تطلع من بين الزوجين تحرضها علي فيها...بعد فترة فصلوها من البعثه وانا اتورطت راتبي لوحده مايكفي تعبت وحاولت وتوسطت يرجعوها للبعثة ومو شرط تدرس بس يعطوونها مكافأة مرافق ورفضوا بعد معاناه 3 شهور ...استخرت ربي وتحملت المسؤوليه ورجعت السعوديه وسجلت بالجامعه والحمدلله بدأت اموري تصير مثل اول وأحسن لكن المشكله بأني رجعت وانا متضايق من الرسايل اللي قريتها ومن لسان زوجتي الطويل ومن شغلات كثيره سوتها فيني...جيت للسعوديه وقعدت اروح الجامعه بالنهار وبالليل اثثتلها شقتنا الجديده وهيا سبتها عند اهلها طلبت من ابوها يربيها وإذا تربت يتصل فيني وعلمته بكل شي...بعد 3 شهور اتصل فيني ورحت انا والوالد واخذتها ورجعت لبيتي وبكت من الفرحه لمن شافت البيت واستانست وطارة من الفرحه واعتذرتلي على كل شي وأنها كانت جاهله وصغيره وانا سامحتها وفتحنا صفحه بيضاء جديده ونسيت مشاكلنا...سجلتها في الجامعه هذا كان شرطهم في عقد النكاح وصرت اروح اوديها للجامعه واروح انا للجامعه والظهر اخلص واروح اصلي الظهر عند جامعتنا يوميا وربي شاهد علي الين الساعه 2 ونرجع البيت طبعا تعبانه فما تبغى تسوي غداء...ادخل انام شوي واصحى العصر احصلها نايمه ولا سوت غداء طيب انا عندي دوام من 5 ل 12 بالليل وعلمتها وصارحتها...صرت الاحظ اي شي يصير بيننا امها عندها خبر عنه...كل يومين ولا ثلاثه تتصل امها ايش فيه وايش صاير بينكم وانا اطلب منها ما تتدخل وهيا إلا تبغى تعرف كل شي وماهي راضيه تفهم...بدأت المشاكل تكثر أكثر بعد ردي لأمها...المشكله ياناس أن زوجتي وربي شاهد علي عشان ما أظلمها تكون كويسه وطيبه وتشتغل وتطبخ وماتقصر معايا وانا كنت اقولها إذا انتي ماقصرتي فابشري باللي يسرك فكنت أدلعها واطلعها واوديها للسوق وإذا شفتها بدأت تقصر اعطيها الوجه الثاني وطناش لين ترجع تتعدل ولسانها مافي منه في الدلع والكلام لكن ياناس مشكلتها الكذب تالف قصص وتتكلم في أهلها وأقاربها وماتعرف تسولف ولا تعرف تتحمل قدام الناس وربي ماتعرف تسوي شي لازم امها تسوي كل شي حتى ملابسها امها تختارها...امها تعبيها رسايل وتعبيها كلام وتعبيها طول الليل ارجع من الدوام مهلوك ابغى اتعشى وابغى اقعد استانس احصلها قالبه عليا بدون سبب ...بديت اعصب منها ومن امها...قبل 3 شهور أخذت جوالها وقلتلها طلعات مافي وانا اوريكم عالكلام أجل تبون تربوني انا اوريكم من يربي الثاني وطلعت من البيت...رجعت شخص ثاني...ماصرت طايقها..صرت اعاملها بنفس اسلوبها وصرت اجي من برا معصب أبغاها تشوف هيا ايش قاعده تسوي فيني...ورجعت لها الجوال وفصلت النت من البيت كرهتها عيشتها وبدأت تتوددلي وتكتب لي رسايل بخط يدها وعالجوال واعتذارات واعترافات منها اني ماقصرت معاها بشي واني مدلعها واني اتعب عشانها وكنت برضوا أذاكرلها للجامعه ومعترفه انها مقصره وأشياء كثيره اعترفت فيها لها علاقه فيني ومن ضمن الكلام انك متحملني وانا اعترف اني غلطت عليك كثير واقسم بالله ماعمري قصدت اي كلمه مو حلوه بحقك بس تطلع بلحظة زعل وما أقصاها ...المهم انا من اللي شفته من بعد الزواج والمشاكل اللي مريت فيها معاها في الغربه وطولة لسانها خلاني اندم على كل شي سويته عشانها فصرت اخلص من الدوام اروح اتمشى وارجع وقت النوم وهي طفشانه...اوديها كم ساعه عند اهلها وارجعها وصرت مستقعد لأمها صارت حرب بيني وبين امها... تدخل اخوها وقلتله انا مابي احد يدخل في حياتي وكيف اعيش مع زوجتي ووصل الكلام هذا لكل اللي عندك...ياناس اقسم بالله اتصل بأهلها كل اسبوع ومايردوا وهيا تتهرب من أهلي...ملابس وسخه بيت وسخ أكل نفس الطبخه من سنه إلا إذا صارت رايقه تحاول تسوي شي جديد...المهم وصلت لمرحله حبي كله قلب لكره.. كيف أنه تبغى تخرب بيتها بيدها وصارت تتشرط وتطلب فلوس بكثره وإذا جيت طلبتها شي في البيت تقول انا مو خدامه...صرت اعاملها بنفس الأسلوب رجعت فصلت النت بالبيت وصار أغلب يومي برا صرت اذا جيت بس تتكلم طفشانه تبغى أحد تسولف معاه وانا اطنش اقولها اسف انا ماني مجبر اسمع كلامك طفي النور خليني انام...اتصلت في ابوها يجي يشوف حل لاني طفشت ومايرد في يوم من الأيام وديتها عند اهلها وبالليل قلتلها اتجهزي انا جايك ورحت واتصل ماترد شوي احصلها جايه مع امها كانوا معزومين رحت للبيت وأرسلتها انا خلاص تعبت مافي احترام لزوجك ولافي دلع إلا بالقطاره كل يوم مشكله وكل يوم يجيك تحريض علي وانتي اي احد يقولك شي تجي تجربيه فيني ردت علي بكلام ماينقال فطلقتها طلقه واحده والآن هي عند اهلها من شهرين...قبل شهر ابوها قابلني انا وابويا وجبت كل الاوراق باعترافاتها بتقصيرها ووريته رسايلها وسبها وقذفها وكل شي حتى تحريض زوجته لبنته عليا..سكت وطالع في الأرض طلع جواله ووراني رسايلها من شهور نفس الكلام اللي في الأوراق تمدح فيني ولا جابت سيرتي باي غلط...بعد فترة اكتشف ام البنت تبغى تشوه صورتي وصارت تنشر خبر مشاكلنا واني انا مقصر وانا ما اوديها الجامعه ولا اوديها مكان وانا رجعت من كندا لاني فاشل وطردوني وأنه بنتها تستاهل اللي احسن مني وانا خلاص وصلت معايا لمن سمعت الكلام ذا ...اتصل ابوها فيني ومارديت فاتصل بابويا ويقول الأسبوع ذا تعالوا نتفاهم والمشاكل تحصل وانا احلف ماراح نحصل زي ولدكم والغلط على بنتنا وإذا أحد تكلم فيكم انا اخذ بحقكم منه...الآن الوالد والوالدة واخواني وخواتي كلهم ضاغطين علي ارجعها وانا ياناس وربي ما انسى الأيام الحلوه اللي بيننا لكن ما اضمن امها وربي في ثانيه وحده تقلبها عليا وابوها يبيني ارجعها وانا من شهرين الحين ما اتصلت فيها ولا هي اتصلت فيني وباقيلها شهر تخلص العده لكن مادري محتار وش اسوي مع امها...ياناس امها ظلمتني ظلم قسما بالله لا يطاق...على قد ماكنا نتزاعل إلا والله تقعد فوق راسي لين أرضى لكن تجيها فترة تقلب بدون سبب واكتشف بعدين امها تعبيها لين زوجتي تضيع بيني وبين امها. انا ما انكر اني احن لها واشتاق للأيام اللي كانت فيها كويسه معايا لكن لمن اتذكر مشاكلنا اخاف ارجعها وترجع المشاكل أكثر وحنا الحين ماعندنا عيال وانا مابي اورط ولد ولا بنت مالهم اي ذنب في مشاكلنا. ياناس احبها وتحبني ومن كثر حبنا وغيرتنا نتضارب على أشياء تافهه لكن المشكله كلها في امها ماتنبسط إذا شافتني اضحك مادري ايش انا سويتها عشان تعاملني بذا الاسلوب...انا والوالد رايحين لهم يوم الثلاثاء وانا مقهور من الظلم كل تعبي أنكروا وانا عتبي على زوجتي كيف أنه صار بيننا مشكله راحت تنكر كل شي انا سويته معاها ونست كل شي...ايش الحل ابي أوقف امها عند حدها ابغى ارد حقي منها والحين إذا رجعت زوجتي كيف أتعامل معاها ...ماقدر ارجع زي اول كنت أحاول أرضيها باي شي لين وصلت لمرحلة مايرضيها ولا شي !!!! مليت من المشااااااكل و الصياح ابغى ارتاح مع زوجتي ابغى اعيش معها كأي زوجين ماحد يتدخل بينهم.

اعذروني أفكاري ملخبطه ومستعجل ابغى الحق صلاة الفجر.

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

hgka,v ,hg;`f

المصدر...