محد يتقدم لي لأني لست موظفة

محد يتقدم لي لأني لست موظفة

شاوروا علي ايش أسوي للأسف كل الحريم يبحثون لاولادهم موظفات وانا مو موظفة ، تخرجت ونسبتي امتياز ف التسعينات ودخلت من اكبر الجامعات ف الخليج وتميت 5 سنوات تعلمت وايد بس للأسف انسحابي كان اجباري لأني مريت بظروف صحية ونفسية والجامعة بنظامها الغبي رفضوا تأجيلي لفصول زيادة مع انه معدلي كان مرتفع واحضرت لهم تقارير طبية ومناقشات مع العميد والدكاترة بدون فايدة ، تحطمت وااايد واااايد لأني كنت من الأوائل وكل أحلامي انهدموا خلاص ، المهم ما حصلت وظيفة لأن شهادتي الجامعية مو مكتملة والوظائف الي حصلتهم فقط محاسبة او سكرتيرة براتب بسيط تقريبا 3 آلاف كل الشركات كذا رواتبهم يعني ايش أسوي فيهم اطلع 6 الصباح والمسافة بعيدة وزحمة وارجع 6 المساء! يعني هذا حتى ما يكفي اذا ابي آخذ لي سيارة صغيرة والبنزين مرتفع سعره فقلت البيت أبرك لي ،،،، المشكلة الشباب يبحثون عن موظفة ومحد يتقدم لي لأن الأغلبية شرطه كذا حتى الحريم ينعجبون فيني لأني ما شاء الله كخليجية جميلة جدا وشكلي مثل الشاميات ألفت الانتباه بس لما يدرون اني ما اشتغل يتأففون ويقولون لأمي شفايدتها بنتج كله ف البيت بس حتى يدتي صارت تشتكي لأمي تقول بنتج غبية لو تشتغل عشان الرجال يشوفوها وينعجبوا فيها أكيد واحد منهم بيتزوجها ! تخيلوا هذا كلام يدتي لأني هادية وبيتوتية وما اطالع ع الرجال ولا أكلمهم اذا رحت السوق اطنشهم ،، شخص وحيد ما يعرفني ولا اعرفه بس كان يبغاني لأني بيضاء وما يهمه اني مو موظفة بس المشكلة بالنسب انا عربية وهو من أصول أفريقية غير معروف النسب فما صار نصيب ، انا ما عندي اخوات او صديقات او بنات بعمري بالعائلة حتى الواتس اب محد يرسل لي وأحيانا اطلع من البيت بدون تلفون لأني صرت ما اهتم له ،أحس بوحدة قاتلة وما عندي سوالف انستجرام وسناب وغيره ، مريت بفترة عصيبة ونومي متقطع وشبه يومي أحلم بمقاعد الدراسة وكان ألعاب الفيديو واليوتيوب ومسلسلات هوليوودية هم متنفسي الوحيد لدرجة صرت افهم كل شي بدون ترجمة وصار كل همي لعبتي مثل ما يقولون للأطفال، قضيت وقتي اتعلم أشياء جديدة يوميا وطورت من نفسي وايد وخذيت كورسات اون لاين وصرت أدرس اطفال أقاربي بمبلغ بسيط لتغطية مصاريفي بس المهم العمر يمضي قربت من ال 26 وما احس اني بتزوج أبدا ومن كثر التفكير بمستقبلي وخوفي أعيش وحيدة صار عندي أصدقاء خياليين موجودين من سنوات براسي واحادثهم يوميا لدرجة مرة كتبت بمذكراتي اني اتمنى انهم يكونون ناس حقيقيين واشوفهم بالجنة اذا ربي كاتب انه ادخل الجنة :( ، دموعي تنزل لما اتذكر ان ممكن اهلي يموتوا بأي وقت وابقى بروحي لأني البنت الوحيدة وصغيرتهم فعشان كذا اتمنى اكمل دراستي واتوظف براتب أحسن بس بعد ما تهدأ نفسيتي وصدمتي تخف ويصير عندي مبلغ يكفي لنفقات الدراسة وللأسف هالشي صعب تحقيقه حاليا ،، وبنفس الوقت انا مابي أكون موظفة اذا تزوجت ودي اهتم بعيالي واراقبهم 24 س وع الأقل الزواج اسهل تحقيقه ما يحتاج اجمع مبلغ وبيكون مستقر لي خاصة لوحدة مثلي ما عندها اخوات لكن ربي ما كاتب لا هذا ولا ذاك ، دعواتكم اتزوج واحد ثري يدخلني هارفارد :(

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

lp] djr]l gd gHkd gsj l,/tm

المصدر...