مشكلتي مع زوجة طليقي

مشكلتي مع زوجة طليقي

السلام عليكم


مشكلتي اني مطلقه وعندي ابن وعلى وشك تخرج إنقطعت علاقتي تماما بطليقي لابرسائل ولا إتصالات يجي آخر كل شهر يعطي ابنه مصروفه ويمشي ، قبل فترة ارسلت لي وحدة مااعرفها رسائل بالواتس عن الظلم والعاقبه الإخلاقيه ( الكارما) فمرة رسائل دينيه ومره بأسلوب ثاني :) طنشت توقعت رسائل عشوائيه الين مازاد الموضوع عن حده وبدأوا يرسلون بالأسماء هنا رجعت للأرقام وعرفت اسماء أصحابها لان مذكور الإسم صريح وبالقبيله وبجمعت حريم من اقاربي كنا نسولف وتذكرت الاسم وذكرته لوحده وعرفتها تقول هذي أخت زوجة طليقك !! انا انصدمت فعلا ياعالم مالي فيهم اي علاقه ولااعرف حتى اسم زوجته قبل هالرسائل والمشكله إنتشر كلام بين الناس لاني بغبائي الي سألتها عن الرقم طّلعت الموضوع والناس بدت تألف قصص ! ارسلت لأخت زوجة طليقي نصا ( ياأخت (فلانه) اليوم فقط عرفت من تكونين وأأكد لك ان مالي اي علاقه بطليقي ولا أهله ولا أعرف سبب رسائلك ولا يهمني اعرف السبب ياليت توقفي عن إزعاجي ولا يكون لي تصرف ثاني ) ..... هنا الموضوع قلب تحدي إتصالات وسب وقذف وكلام وصخ وبأرقام مختلفه مرات ارد ومرات اطنش إلين فاض فيني طلعت رقم زوجة طليقي من تحت الأرض وكلمتها طبعا حوالي يومين ادق ولا ترد وتقفل الجوال وبالأخير ردت وكنت منفعله حييل تقول انتي ماتستحين ومشغله زوجي بالاتصالات والرسايل 😳 وبس تتراسلون بتويتر وشغالين رسايل حب وعشق 😰 وحتى وانا معه على الفراش يقول اسمك وكلام كثير قلت يابنت الحلال احلف على المصحف والي يخلي لي ولدي ماراسلته بحرف ولا حتى هو ماادري وش وضعكم لكن لاتدخلوني بينكم ووقفي رسايل واتهام ولا اخذ الرسايل الي عندي واقدم فيكم بلاغ وسكرت بوجهها ..
الآن وش رايكم وش الحل ودي اخذ حقي صحيح ماعاد احد يرسل بس يحز بنفسي ان الناس تنظر لي نظره خرابة بيوت وابي اعرف من يطلع سوالف وان كنت شاكه بطليقي ممكن يهايط عندها او عند احد اني ابيه واراسله يرجعني مااستبعد عليه هالشيء ! وش انسب تصرف اواجه طليقي او اقدم بلاغ بإزعاج مو عارفه وش اتصرف لأن خلاص الموضوع بين الحريم انتشر بتفاصيله وبعد حتى عند جماعة زوجته ماادري عن الكلام الي جالس ينتشر
وفيه موضوع مهم ان قبل فترة تقدم لي خاطب وهو رجال ماشاء الله مثقف ومعه ماستر وغني والكل يمدح بأخلاقه مطلق من سنتين لان زوجته رفضت تطلع بعثه معه واشوفه مناسب لي جدا واخواني كلموا طليقي عن ابني قال ماراح اخذه واحرمه من أمه ويدعي لي بالتوفيق والخاطب يقول لو تكتب بالعقد شرط ابنها معها ماعندي مانع
عقلي وقف فعليا هل ممكن احد يبي يخرب علي والغريب فعلا ان الرجال ولا اهله مارجعوا تواصلوا معنا مع اننا خلاص شبه متفقين وشفته وشافني وكان مستعجل وطاير على التحاليل والملكه وبعدها ماعاد رجع اتصل ولا اهله واخوي قال لأمي الظاهر غيروا رايهم ..
افيدوني واعتذر عن الإطاله

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

la;gjd lu .,[m 'gdrd

المصدر...